શિવસેના યુબીટીના પ્રમુખ ઉદ્ધવ ઠાકરેએ તાજેતરમાં લદ્દાખના જાણીતા એજ્યુકેશનિસ્ટ અને એન્વાયર્નમેન્ટલિસ્ટ સોનમ વાંગચુકની અટકાયત અને તેમના પરના પગલાંને લઈને કેન્દ્રની ભારતીય જનતા પાર્ટી સરકાર પર આકરા પ્રહારો કર્યા છે. ઠાકરેએ સીધો સવાલ ઉઠાવ્યો છે કે જો સોનમ વાંગચુક લદ્દાખના હકો અને છઠ્ઠા શેડ્યૂલની માંગણી માટે આંદોલન કરે તો તેઓ દેશદ્રોહી બની જાય છે પરંતુ ભૂતકાળમાં વડાપ્રધાન નરેન્દ્ર મોદીએ પાકિસ્તાનના તત્કાલીન વડાપ્રધાન નવાઝ શરીફને મળવા ગયા હતા તે શું રાષ્ટ્રપ્રેમ હતો.

ઉદ્ધવ ઠાકરેએ ભારપૂર્વક જણાવ્યું કે દેશમાં ન્યાય માટે લડવું હવે રાજદ્રોહ સમાન ગણવામાં આવી રહ્યું છે. તેમણે કહ્યું કે સોનમ વાંગચુકની લડાઈ માત્ર લદ્દાખની પ્રકૃતિ અને સંસ્કૃતિને બચાવવા માટેની છે જે પ્રજાની માંગ છે. શાંતિપૂર્ણ રીતે પોતાના હકોની માંગણી કરનાર વ્યક્તિ પર આ રીતે પગલાં લેવામાં આવે તે લોકશાહીનું ગળું દબાવવા સમાન છે. તેમણે કહ્યું કે ભાજપ દેશપ્રેમનું નાટક કરી રહી છે. એક તરફ એવા લોકો છે જેઓ દેશના સૈનિકોના બલિદાનની વાત કરે છે અને બીજી તરફ એ જ પાર્ટીના નેતાઓ પાકિસ્તાન સાથે ક્રિકેટ મેચ રમવાના આયોજનમાં વ્યસ્ત છે.

ઠાકરેએ વડાપ્રધાન નરેન્દ્ર મોદીની નવાઝ શરીફ સાથેની મુલાકાતને યાદ અપાવતા કહ્યું કે જો સોનમ વાંગચુકને ન્યાયની વાત કરવા બદલ દેશદ્રોહી ગણવામાં આવે તો ભૂતકાળમાં નવાઝ શરીફને મળવા ગયેલા વડાપ્રધાનના પગલાને કયા માપદંડથી માપવા. તેમણે સ્પષ્ટ કર્યું કે રાજકીય અનુકૂળતા મુજબ દેશપ્રેમ અને દેશદ્રોહની વ્યાખ્યા બદલવી એ અયોગ્ય છે. આ નિવેદન દ્વારા ઉદ્ધવ ઠાકરેએ વિપક્ષો દ્વારા સરકાર પર વારંવાર લગાવવામાં આવતા બેવડા ધોરણો અપનાવવાના આક્ષેપોને વધુ મજબૂત બનાવ્યા છે. લદ્દાખમાં ચાલી રહેલા આંદોલનને ઉદ્ધવ ઠાકરેએ પોતાનું સમર્થન જાહેર કર્યું છે અને ભાજપના 'મારું કંકુ મારો દેશ' જેવા આંદોલનોની ટીકા કરીને તેમના પર વેપાર માટે દેશને વેચવાનો આરોપ લગાવ્યો હતો. આ સમગ્ર વિવાદે દેશના રાજકારણમાં એક નવો વળાંક આપ્યો છે.