લર્નિંગ લાયસન્સ પૂરું થાય તો ચિંતા નહીં, હવે 150 રૂપિયા ભરી કરવો રીન્યુ જાણો શું બદલાયો નિયમ..
લોકોને હેરાનગતિ કરવા વાળો નિયમ આખરે બદલાયો
લર્નિંગ લાઇસન્સ પૂરું થયા બાદ રૂપિયા 150 ભરી રિન્યૂ થશે, નવું નહીં કઢાવવું પડે
અગાઉ પાકા લાઇસન્સની અને સ્માર્ટ કાર્ડની ફી પરત કરાતી નહોતી
લર્નિંગ લાઇસન્સ એક્સપાયર થશે તો ફરી કમ્પ્યૂટર ટેસ્ટ આપવો નહીં પડે
હવે વાત એમ છે કે સરકારે લર્નિંગલાઇસન્સ વખતે જ ફરજિયાત ભરાવાતી પાકા લાઇસન્સ ટેસ્ટ અને સ્માર્ટ કાર્ડની ફી લર્નિંગ લાઇસન્સ પૂરું થતાં સરકાર દ્વારા પરત નહીં કરી કરોડોની ઉઘાડી લૂંટ કરાતી હતી, જે હવેથી બંધ થશે
ટ્રાન્સપોર્ટ વિભાગ દ્વારા લર્નિંગ લાઇસન્સ અને ફીના નિયમમાં ફેરફાર કરાયો છે. લર્નિંગ લાઇસન્સ 6 મહિના બાદ અેક્સપાયર થઈ જાય તો હવેથી ઉમેદવારે ફરી કમ્પ્યૂટર ટેસ્ટ આપવો નહીં પડે. પોતાના જૂના લર્નિંગ લાઇસન્સનો સંદર્ભ પરિવહનના સોફ્ટવેરમાં સાંકળી આરટીઓ કચેરીમાં ડોક્યૂમેન્ટ વેરીફાઈ કરાવીને ફરી લર્નિંગ લાઇસન્સ મેળવી શકાશે
જેના પગલે ટેસ્ટ ટ્રેક પર ટેસ્ટ આપવામાં વારંવાર નાપાસ થતા ઉમેદવારોને લર્નિંગ લાઇસન્સના કમ્પ્યૂટર ટેસ્ટની ઝંઝટમાંથી છુટકારો મળશે તેમજ આઇટીઆઇ ખાતે ભારણ ઓછું થશે.
આ સાથે સૌથી મોટો બદલાવ આ જોગવાઇનો કરવામાં આવ્યો છે. સારથી-4 સોફ્ટવેરમાં અગાઉ અંદાજે 700 રૂપિયા જેવી માતબર રકમ લર્નિંગ લાઈસન્સ એક્સપાયર થતાં પરત મળતી નહોતી, જે હવે ફરી લર્નિંગ લાઇસન્સ કરાવતી વખતે માત્ર 150 રૂપિયા લર્નિંગ લાઇસન્સની ફી ભરવાની રહેશે. જો નાગરિક દ્વારા એક પણ વખત ટેસ્ટ આપવામાં નહીં આવ્યો હોય તો ટેસ્ટ ફીના પૈસા પણ ફરી વખત માન્ય રહેશે. લર્નિંગ લાઇસન્સ કઢાવ્યાથી એક વર્ષ સુધી જો કોઇ કાર્યવાહી નહીં કરે તો જ ફરી પૈસા ભરવાના થશે. સારથી-4 સોફ્ટવેર શરૂ થયાથી વર્ષો સુધી સરકારે નાગરિકો પાસે કરેલી ઉઘાડી લૂંટ 29 સપ્ટેમ્બરે કરેલા પરિપત્રથી બંધ થશે.
અગાઉ લર્નિંગ સાથે ફરજિયાત પાકા લાઇસન્સના પૈસા પણ લર્નિંગ લાઇસન્સ વખતે લઈ રિફંડ અપાતું ન હતું. જે હવે નિયમ બદલાતા અરજદારોને ફાયદો થશે.