ભાણેજ શર્મિન સેગલના સપોર્ટમાં ઊતર્યા મામા સંજય ભણસાલી:કહ્યું, 'મારી ભાણી હોવાને કારણે તેને કાસ્ટ નથી કરવામાં આવી, તે 'આલમઝેબ'ના રોલ માટે પર્ફેક્ટ હતી'

તાજેતરમાં એક ઈન્ટરવ્યૂ દરમિયાન સંજય લીલા ભણસાલીને આ અંગે સવાલ કરવામાં આવ્યો હતો. તેની ભાણેજને ટેકો આપતા ભણસાલીએ તેની પસંદગી પ્રક્રિયા વિશે વાત કરી.

સંજય લીલા ભણસાલીએ કહ્યું, 'આલમઝેબના રોલ માટે શર્મિનનો પર્ફેક્ટ ચહેરો હતો જે મેં જોયો હતો. જો તમે આલમઝેબનો રોલ જોયો હોય તો એ દર્શાવવામાં આવ્યું છે કે તે ગણિકા બનવા માગતી નથી. હું આ રોલ માટે એવા નવા ચહેરાની શોધમાં હતો જેના ચહેરા પર નિર્દોષતા હોય. જે ગણિકાની જેમ વાત ન કરે. જેને કવિતામાં રસ હોય. તેથી આ બધી બાબતોને ધ્યાનમાં રાખીને મને શર્મિન આલમઝેબના રોલ માટે પર્ફેક્ટ લાગી.'

શર્મિનની ટ્રોલિંગ વિશે વાત કરતાં સંજયે કહ્યું,'મેં તેને કાસ્ટ તે કારણથી નથી કરી કે તે મારી ભાણેજ છે. આ રોલ માટે તેણે ઘણી વખત ઓડિશન આપ્યું હતું. આ સમયગાળા દરમિયાન તે ઘણા ટેસ્ટમાંથી પસાર થઈ છે. મને ખબર નથી કે મેં તેના કેટલા ટેસ્ટ લીધા છે, મને ગણતરી બરાબર યાદ નથી.’

‘જ્યારે મેં નક્કી કર્યું હતું કે, હું શર્મિનને કાસ્ટ કરીશ, ત્યારે મેં તેને કહ્યું કે, તારે ટેસ્ટ આપવો પડશે. આલમઝેબના પાત્ર પર યોગ્ય પકડ હોવી જોઈએ. કારણ કે આ એક એવી દુનિયા છે જ્યાં તમે પહેલા કદી પગ મૂક્યો નથી. તમે ક્યારેય અભિનય કર્યો નથી. મેં કાસ્ટ કરેલા આ તમામ કલાકારોની કારકિર્દી ઘણા વર્ષો સુધી રહી છે. કોણ જાણે તેમણે કેટલાં પાત્રો ભજવ્યાં હશે. તે લોકો જાણે છે કે કોમળતા શું છે અને તેને સ્ક્રીન પર કેવી રીતે લાવવી, પરંતુ તમે નથી જાણતા. તમારે આ બધું શીખવું પડશે. કોમળતા, નખરા અને બધું જ.’