અમેરિકાએ પાકિસ્તાનના રાજદૂતને એરપોર્ટ પરથી જ પરત મોકલ્યો

અમેરિકાએ પાકિસ્તાની રાજદૂતને ડિપોર્ટ કરી ફજીત કરાવી

અમેરિકી રાષ્ટ્રપતિ તરીકે શપથ લીધા બાદથી ડોનાલ્ડ ટ્રમ્પે ઇમિગ્રેશન નિયમોને લઈ કડક વલણ અપનાવ્યું છે. આ નીતિનો તાજેતરમાં તુર્કમેનિસ્તાનમાં પાકિસ્તાનના રાજદૂત કે.કે. અહેસાન વાગન પર પ્રભાવ પડ્યો છે, જેમને લોસ એન્જલસ એરપોર્ટ પર જ રોકી ડિપોર્ટ કરવામાં આવ્યા હતા.

વિસાની જાણકારી હોવા છતાં પરત મોકલાયા

પ્રાપ્ત માહિતી અનુસાર, કે.કે. અહેસાન વાગન પાસે માન્ય યુએસ વિઝા અને તમામ જરૂરી દસ્તાવેજો હતા. તેમ છતાં, લોસ એન્જલસ એરપોર્ટ પર અમેરિકન ઈમિગ્રેશન અધિકારીઓએ તેમને દેશમાં પ્રવેશની મંજૂરી ન આપી. ઈમિગ્રેશનમાં થયેલા વિવાદને પગલે તુરત જ તેમને પાછા મોકલી દેવામાં આવ્યા.

વિદેશ મંત્રાલયની કાર્યવાહી

આ ઘટનાની ગંભીરતા જોઈને પાકિસ્તાનના વિદેશ મંત્રી ઈશાક ડાર અને વિદેશ સચિવ અમીના બલોચને આ મામલાની જાણ કરવામાં આવી છે. વધુમાં, લોસ એન્જલસ સ્થિત પાકિસ્તાની દૂતાવાસને આ મામલાની તપાસ કરવાનું નિર્દેશ આપવામાં આવ્યું છે.

કારકિર્દી અને ભવિષ્યના સંકેત

કે.કે. અહેસાન વાગન એ લાંબા સમયથી પાકિસ્તાન વિદેશ સેવા સાથે જોડાયેલા છે. અગાઉ તેઓ કાઠમંડુમાં સેકન્ડ સેક્રેટરી, લોસ એન્જલસમાં ડેપ્યુટી કોન્સલ જનરલ અને મસ્કત તેમજ નાઈજરમાં પાકિસ્તાની રાજદૂત તરીકે પણ ફરજ બજાવી ચૂક્યા છે.

પાકિસ્તાન સરકારનો પ્રતિકાર

આ ઘટનાને પગલે રાજદ્વારી પ્રોટોકોલને લઈને ચિંતા વ્યક્ત થઈ છે. પાકિસ્તાની સરકાર ટૂંક સમયમાં કે.કે. અહેસાન વાગનને ઇસ્લામાબાદ પરત બોલાવી શકે છે.

આ ઘટના સ્પષ્ટ કરે છે કે અમેરિકન પ્રશાસન હવે વિદેશી રાજદૂતોને પણ ઇમિગ્રેશન નીતિ હેઠળ કડક ચકાસણીમાં લઈ રહ્યું છે.