નીરજ ચોપરાએ ઓસ્ટ્રાવા ગોલ્ડન સ્પાઇકમાં જીત્યો ગોલ્ડ મેડલ

ભારતના ઓલિમ્પિક ચેમ્પિયન નીરજ ચોપરાએ ચેક રિપબ્લિકમાં યોજાયેલી પ્રતિષ્ઠિત ઓસ્ટ્રાવા ગોલ્ડન સ્પાઇક એથ્લેટિક્સ મીટમાં ગોલ્ડ મેડલ જીતીને ફરી એક વખત દેશનું નામ રોશન કર્યું છે. નીરજ ચોપરાએ ત્રીજા રાઉન્ડમાં 85.29 મીટરના જોરદાર થ્રો સાથે ગોલ્ડ મેડલ મેળવ્યો, જેને કોઈપણ એથ્લીટ પાર કરી શક્યો નથી.

દક્ષિણ આફ્રિકાના ડવ સ્મિતે બીજા રાઉન્ડમાં 84.12 મીટરના થ્રો સાથે સિલ્વર મેડલ મેળવ્યો, જ્યારે ગ્રેનાડાના પીટર એન્ડરસને પોતાના પહેલા પ્રયાસમાં 83.63 મીટરના થ્રો સાથે બ્રોન્ઝ મેડલ મેળવ્યો.

2018માં પણ હતો ઓસ્ટ્રાવાના મેદાનમાં

નીરજ ચોપરા માટે ઓસ્ટ્રાવા કોઈ અજાણું મેદાન નથી. તેમણે 2018માં IAAF કોન્ટિનેન્ટલ કપમાં ભાગ લીધો હતો જ્યાં 80.24 મીટરના થ્રો સાથે છઠ્ઠું સ્થાન મેળવ્યું હતું. હવે, 2024માં ઓસ્ટ્રાવા ગોલ્ડન સ્પાઇકમાં ગોલ્ડ મેડલ જીતવું એ ચોપરા માટે યાદગાર પળ બની રહી.

સિઝનમાં સતત સફળતાની શ્રેણી

ઓસ્ટ્રાવામાં જીત એ નીરજ ચોપરાની સિઝનની પાંચમી સ્પર્ધા હતી. વર્ષના આરંભમાં દક્ષિણ આફ્રિકાના પોચેફસ્ટ્રૂમમાં એક આમંત્રણ ટૂર્નામેન્ટમાં તેમણે 84.52 મીટરના થ્રો સાથે વિજય મેળવ્યો હતો. ત્યારબાદ દોહાના ડાયમંડ લીગમાં તેમણે 90.23 મીટરના ચમકદાર થ્રો સાથે 90 મીટરના આંકડાને પાર કર્યો હતો, જ્યા તેઓ જુલિયન વેબર (91.06 મીટર) બાદ બીજા સ્થાને રહ્યા હતા.

પોલેન્ડના ચોર્ઝોવમાં જાનુઝ કુસોઝિન્સ્કી મેમોરિયલમાં 84.14 મીટરના થ્રો સાથે વેબર (86.12 મીટર) બાદ ફરી બીજા સ્થાને રહ્યા, પરંતુ પેરિસ ડાયમંડ લીગમાં નીરજ ચોપરાએ જુલિયન વેબરને 88.16 મીટરના થ્રો સાથે હરાવી ટોચનું સ્થાન મેળવ્યું.

નીરજ ચોપરા: ભારતનો ગૌરવ

ઓસ્ટ્રાવાની વિજય એ નીરજ ચોપરા માટે માત્ર મેડલ નહીં, પણ તેમની સતત મહેનત, દ્રઢ સંકલ્પ અને વૈશ્વિક સ્તરે ભારતના નામનું પ્રતિબિંબ છે. ચોપરા એ ફરી સાબિત કર્યું છે કે ભાલાફેંકમાં તેઓ ભારતના અજેય ચેમ્પિયન છે.